बुधबार मध्याह्न १२ बजेर दुई मिनेटमा बालाबेसी आइपुगेको हेलिकोप्टर अवतरणको क्रममा भित्तामा ठोकिएर दुर्घटना भएको हो ।
- चैत्र ४, २०८२
खोटाङ — केपिलासगढी गाउँपालिका–२ खार्तम्छा बालाबेसीमा एअर डाइनेस्टीको हेलिकोप्टर दुर्घटना भएको छ । बुधबार मध्याह्न १२ बजेर दुई मिनेटमा बालाबेसी आइपुगेको हेलिकोप्टर अवतरणको क्रममा भित्तामा ठोक्किएर दुर्घटना भएको हो ।
प्रहरी नायब उपरीक्षक प्रकाश बुढाथोकीका अनुसार एअर डाइनेस्टीको नाइन एन–एएफक्यू नम्बरको हेलिकोप्टर दुर्घटना हुँदा हेलिकोप्टरमा सवार ललितपुर निवासी ६५ वर्षीय काजीबहादुर राई घाइते भएका छन् । उनको दाहिने खुट्टामा चोट लागेको खार्तम्छाका वडाध्यक्ष मिलन राईले बताएका छन् ।
काजीबहादुर र पाइलट सवीन थापालाई एअर डाइनेस्टीकै नाइन-एनएएनए नम्बरको हेलिकोप्टरबाट मध्याह्न १२: ३५ बजे काठमाडौं पठाइएको वडाध्यक्ष राईले सुनाएका छन् ।
उक्त हेलिकोप्टरमा एक महिनाअघि युकेमा मृत्यु भएकी ८० वर्षीया मनलक्षी राईको अन्त्येष्टिका लागि मृतकका आफन्त आएका थिए । मृतकका श्रीमान ८२ वर्षीय डाकमणि राई, छोरा ५३ वर्षीय बालकुमार राई, छोरी ४७ वर्षीया लक्ष्मी राई, आफन्त ४० वर्षीया समला राई र ललितपुर घर भएका घाइते काजीमान राई हेलिकोप्टरमा सवार थिए ।
मृतकको शव भने गाडीमार्फत बिहीबार गाउँ आइपुग्ने आफन्तले जनाएका छन् । आफन्तहरू भने सकुशल रहेको वडाध्यक्ष राईले बताएका छन् । दुर्घटनालगत्तै पाइलटले इन्जिन अफ गरेपछि थप क्षति हुन नपाएको हेलिकोप्टरमा सवार लक्ष्मी राईले बताएकी छन् ।
